KITE Palakkad

Prof: C. Raveendranath

ഓണാവധി കഴിഞ്ഞ്‌ ഈ മാസം 29 നു നമ്മുടെ പൊതു വിദ്യാലയങ്ങൾ തുറക്കുകയാണ്. പ്രളയബാധിത പ്രദേശങ്ങളിലെ നമ്മുടെ പൊതുവിദ്യാലയങ്ങൾ പലതും നാശനഷ്ടങ്ങൾ നേരിട്ടും മണ്ണും ചെളിയും മാലിന്യങ്ങളും വന്നടിഞ്ഞും പ്രവർത്തന സജ്ജമല്ലാതായിരിക്കുകയാണ്. ഒട്ടു മിക്ക സ്കൂളുകളിലും ദുരിതാശ്വാസ ക്യാമ്പുകൾ പ്രവർത്തിച്ചു വരുന്നു. ഈ പ്രളയ ദുരിത കാലത്ത് പൊതു വിദ്യാലയങ്ങൾ സമൂഹത്തിന് ഇത്രയേറെ പ്രയോജനപ്രദമായി എന്നതിൽ നമുക്കെല്ലാം അഭിമാനിക്കാം. ദുരിതാശ്വാസ ക്യാമ്പുകൾ പിരിച്ചു വിട്ട ഇടങ്ങളിലും വിദ്യാലയങ്ങളെ പ്രവർത്തന സജ്ജമാക്കാൻ നമ്മുടെ കൂട്ടായ ശ്രദ്ധ ആവശ്യമാണ്. ഈ പശ്ചാത്തലത്തിലാണ് പൊതു വിദ്യാഭ്യാസ വകുപ്പിന്റെ നേതൃത്വത്തിൽ ഈ മാസം 26, 27, 28 തീയതികളിൽ പ്രളയ ബാധിത പ്രദേശങ്ങളിലെ പൊതു വിദ്യാലയങ്ങളെ പ്രവർത്തന സജ്ജമാക്കാൻ സന്നദ്ധ സേവനയജ്ഞം നടത്താൻ നിശ്ചയിച്ചിട്ടുള്ളത്‌. പൊതു വിദ്യാഭ്യാസ വകുപ്പിലെ എല്ലാ അധ്യാപകരും ഇതര ജീവനക്കാരും പൂർവ്വ വിദ്യാർത്ഥികളും രക്ഷിതാക്കളും പൊതു പ്രവർത്തകരും സംയുക്തമായി കൈകോർത്ത്‌ ഈ മഹത്തായ യജ്ഞം വിജയിപ്പിക്കണമെന്ന് അഭ്യർത്ഥിക്കുന്നു.